Presidentja e Kosovës, Vjosa Osmani, me një video gati pesëminutëshe, është përpjekur sërish t’i paraqesë fotografitë e saj me presidentin e SHBA-ve, Donald Trump, dhe me sekretarin e Shtetit, Marco Rubio, si “biseda përmbajtësore”.
Por, në asnjë moment nuk ka treguar se cilat ishin temat ku biseda kishte fokus dhe përmbajtje.
Takimi i Osmanit me Trump ishte pjesë e fotografisë që presidenti amerikan bën me të gjithë liderët e shteteve pjesëmarrëse, dhe zakonisht krejt procedura zgjat vetëm disa sekonda.
Ndërsa me sekretarin Rubio, fotografia dukej se ishte bërë në një sallë ku po mbahej një takim kurtuazie.
Megjithëse Osmani e transmetoi si takim, vetë Rubio nuk e prezantoi fotografinë me presidenten Osmani.
Në këtë video, Osmani ka paraqitur edhe takimet me krerë dhe zyrtarë të shteteve tjera që morën pjesë në punimet e Asamblesë së Përgjithshme të OKB-së.
Në SHBA po qëndron ende edhe kryeministri, Albin Kurti, i cili nuk është pritur nga askush prej qeverisë amerikane, por vetëm nga disa kongresistë dhe ka marrë pjesë në takime me komunitetin shqiptar.
Nga atje, ai dha një deklaratë që u kritikua shumë, kur tha se “nuk është problem i tij” përpjekja e SHBA-ve për ta larguar ndikimin rus në Serbi.
