Gjykata Kushtetuese e ka shpallur antikushtetues një dispozitë të Statutit të Shërbimit Spitalor dhe Klinik Universitar të Kosovës (SHSKUK), të miratuar më 27 dhjetor 2023 nga Qeveria e Albin Kurtit, e cila përcakton listën e shërbimeve shëndetësore që ofrohen në spitalet e përgjithshme.
Rasti ishte iniciuar nga Avokati i Popullit, Naim Qelaj, i cili kontestoi nenin 11, paragrafi 1, pasi ky nuk përfshinte “kujdesin mendor” si shërbim dytësor në spitalet e përgjithshme.
Gjykata vendosi unanimisht se ky paragraf nuk përputhet me Kushtetutën, përkatësisht me “paragrafin 1 të nenit 51 [Mbrojtja Shëndetësore dhe Sociale] në lidhje me paragrafin 1 të nenit 7 [Vlerat] dhe paragrafin 4 të nenit 92 [Parimet e Përgjithshme] të Kushtetutës së Kosovës”.
Qeveria është urdhëruar të ndryshojë këtë dispozitë në përputhje me Kushtetutën dhe ligjin në fuqi. Deri atëherë, spitalet e përgjithshme duhet të ofrojnë të gjitha shërbimet shëndetësore, përfshirë kujdesin mendor, sipas Ligjit për Shëndetin Mendor.
