Gazetari Arlind Imeri ka ngritur padi për shpifje ndaj kryetarit të Komunës së Fushë-Kosovës, Valon Prebreza, pasi ky i fundit e quajti atë “spiun të Serbisë” dhe “UDB-ash” gjatë një seance të Kuvendit Komunal.

Lajmin për ngritjen e padisë e ka bërë të ditur vetë Imeri, përmes një postimi, ku ka njoftuar se padinë e ka dorëzuar në Gjykatën Themelore në Prishtinë, Dega në Fushë-Kosovë.

Imeri ka kërkuar që gjykata ta trajtojë rastin me prioritet, duke pretenduar se deklaratat e kryetarit kanë vënë në rrezik sigurinë e tij fizike.

“Prebrezës tani do t’i duhet që para gjykatës t’i paraqesë të gjitha provat që ka se unë kam shërbyer në UDB-në serbe”, ka shkruar Imeri.

Postimi i Imerit:

https://www.facebook.com/permalink.php?story_fbid=pfbid0xCbeNMEXuyte4yBcUvfzfRCbeNE6qH6dgAW1S8q2vds7yiUfG1YK5SsYjT7pkdE2l&id=61595530932848

Ndërkaq, gjatë një seance të Kuvendit Komunal, Valon Prebreza e kishte quajtur Imerin “spiun të Serbisë”, “UDB-ash” dhe “Leptir”.

“Ma i sulmumi në Kosovë jam unë, pikërisht prej gazetarëve të thirrur si gazetarë, e që është fatkeqësi qysh ka asambleist këtu të partisë respektuese që del edhe e mbron një të ashtuquajtur gazetar, që po na del që është spiun i Serbisë, UDB-ash, Leptir”, kishte deklaruar Prebreza.