Ish-ministri rus i Transportit, Roman Starovoit, i cili u shkarkua nga Presidenti Vladimir Putin, është vetëvrarë me armë zjarri, thanë autoritetet ruse të hënën.
Sipas mediave të kontrolluara nga Kremlini, Starovoit u gjet i vdekur me një plagë nga arma e zjarrit në Odintsovo, pranë Moskës. Zyrtarët rusë thanë se besojnë se ishte vetëvrasje.
“Rrethanat e incidentit janë duke u sqaruar. Versioni kryesor është vetëvrasje”, tha në një deklaratë zyrtarja e Komitetit Hetimor të Rusisë, Svetlana Petrenko, ndërsa në Moskë po përhapen spekulime.
Një ligjvënës tha se vdekja e Starovoit mund të ketë ndodhur përpara se ai të shkarkohej nga presidenti.
Kremlini publikoi një dekret më herët të hënën duke thënë se Putini e kishte shkarkuar Starovoitin, pa dhënë ndonjë arsye zyrtare për shkarkimin.
Shkarkimi i Starovoit pasoi ndërprerje të shumta në rrjetin e udhëtimit ajror të Rusisë, me qindra fluturime të anuluara për shkak të kërcënimeve të vazhdueshme nga dronët ukrainas.
Starovoit u emërua ministër i Transportit i Rusisë në maj 2024. Para se të bëhej ministër, ai kaloi gati pesë vite si guvernator i përkohshëm dhe drejtues i rajonit të Kurskut, që kufizohet me Ukrainën.
