Anëtarja e Kryesisë së Partia Demokratike e Kosovës, Vlora Çitaku, ka përjashtuar mundësinë që kryetari i Nisma Socialdemokrate, Fatmir Limaj, të përfshihet në listën zgjedhore për zgjedhjet parlamentare të 7 qershorit.

Në një intervistë në emisionin “Frontal” në T7, Çitaku theksoi se fokusi i PDK-së është ndërtimi i një liste sa më gjithëpërfshirëse, me theks të veçantë te përfshirja e figurave të reja në politikë.

Ajo u shpreh se skena politike në Kosovë ka nevojë për energji dhe personalitete të reja, duke shtuar se shumë prej politikanëve aktualë kanë një përvojë të gjatë në këtë fushë.

Sa i përket përfshirjes së Limajt, Çitaku ishte e prerë, duke thënë se kjo temë nuk është diskutuar fare në strukturat e partisë.

“Nuk është çështje fare”, u shpreh ajo, duke shtuar se ky debat po zhvillohet më shumë në studio televizive sesa brenda organeve vendimmarrëse të PDK-së.