Komisioni Qendror i Zgjedhjeve ka vendosur që të numërohen gjithsej 914 vendvotime të zgjedhjeve parlamentare të 28 dhjetorit. Kjo për shkak të dyshimeve për manipulim të votave të kandidatëve brenda partive.
Vendimi u mor me 9 vota për dhe dy abstenime. Rinumërimi do të nis sot. Bëhet me dije se në 10 komuna, votat do të rinumërohen në tërësi, ndërsa në 28 të tjerat do të rinumërohen 10 për qind e vendvotimeve.
Vendimi erdhi pas raportit të Sekretariatit të KQZ-së, i cili gjatë verifikimit të videoincizimeve nga Qendrat Komunale të Numërimit ka evidentuar mospërputhje mes votave të numëruara për kandidatë dhe atyre të shënuara në fletëvotime.
“Deri dje, 12 janar, janë verifikuar 33 vendvotime, ku rezulton se votat e kandidatëve të numëruara në Qendrat Komunale të Numërimit nuk pasqyrojnë numrin e votave të kandidatëve të evidentuara në fletëvotime”, njoftoi KQZ-ja.
100 për qind e votave do të numërohen në Dragash, Kaçanik, Leposaviq, Prizren, Skenderaj, Shtime, Ferizaj, Vushtrri, Mamushë dhe Ranillugu.
Ndërsa, 10 për qind e votimeve do numërohen në Deçan, Gjakovë, Gllogoc, Gjilan, Istog, Klinë, Fushë-Kosovë, Kamenicë, Mitrovicë e Jugut, Lipjan, Novobërdë, Obiliq, Rahovec, Pejë, Podujevë, Prishtinë, Shtërpcë, Suharekë, Viti, Zubin-Potok, Zveçan, Malishevë, Junik, Hani i Elezit, Graçanicë, Partesh, Kllokot dhe Mitrovicë e Veriut.
Kryetari i KQZ-së, Kreshnik Radoniqi, tha se nëse pas rinumërimit konstatohet se janë manipuluar votat e kandidatëve brenda partive, do të paraqiten në Prokurori të gjithë ata që kanë bërë manipulime.
“Kjo do të vendoset pasi që të përfundojë rinumërimi”, tha Elezi.
