Të shtunën e 12 korrikut në orën 11:00, para stacionit të Policisë në Lipjan do të mbahet protestë për të kërkuar drejtësi për të ndjerin Agon Zejnullahu i cili vdiq në duart e policëve më shtatë korrik.
Kështu ka njoftuar përmes një shkrimi në Facebook, vëllai i të ndjerit, Albani, teksa ka ftuar qytetarët që t’i bashkohen sa ma masovikisht kësaj proteste.
“Ne si familjarë jemi thellësisht të tronditur nga humbja që kemi pësuar. Megjithatë, në gjithë këtë vuajtje, po mbledhim veten për ta kthyer rastin tragjik të Agonit në forcë dhe kauzë mbarëkombëtare”, ka shkruar ai.
Zujnullahu ka theksuar se institucionet kanë një detyrë themelore “të kujdesen minimalisht për jetën tonë – gjë që, në rastin e Agonit, nuk ndodhi”.
“Ju ftojmë të gjithëve t’i bashkoheni protestës. Ajo do të jetë paqësore, pa asnjë konotacion politik, dhe me një kërkesë të vetme: Drejtësi për Agonin. Le të jetë kjo hera e fundit që një qytetar humb jetën nga dështimi i atyre që duhet ta mbrojnë”, shtoi.
Pesë policë janë në paraburgim dhe po dyshohen për “vrasje nga pakujdesia”.
Video të xhiruara nga momenti i arrestimit të Zejnullahut janë publikuar në media, duke nxitur reagim të shumta.
Në anën tjetër, familja e të ndjerit kanë akuzuar policët për “dhunë të tepruar” ndaj 27 vjeçarit.
