Jetesë në Evropë. Ky është benefiti që siç duket është shndërruar në standard për individët që po dëshmojnë kundër krerëve në Speciale.
Në një shkresë të datës 28 maj 2025, thuhet se personat që po përfitojnë azil në shtete të huaja janë kryesisht ata që po paraqiten si viktima në gjyq.
Ky dokument, i nxjerrur si lloj raporti nga Zyra për Pjesëmarrjen e Viktimave në kuadër të DHSK-së thekson se këta individë po paraqesin kinse “frikë për kthim në Kosovë”.
“Disa Viktima Pjesëmarrëse në Procedurë janë detyruar të kërkojnë dhe u është dhënë azil si rezultat i frikës për sigurinë e tyre në Kosovë. Një tjetër është tërhequr nga procedurat për shkak të shqetësimeve për sigurinë, por ky nuk është i vetmi që u përball me kërcënime si në internet ashtu edhe në botën reale”, theksohet në këtë raport të hartuar nga ZPP në kuadër të Gjykatës Speciale.
Argumenti i frikës për sigurinë në Kosovë duket se kontestohet nga fakti se nga 155 persona që u pranuan si viktima pjesëmarrëse, thuajse ndaj të gjithëve janë aplikuar masa mbrojtëse.
Kjo nënkupton se Specialja ka redaktuar çdo detaj të mundshëm që mund të çojë në zbulimin e identitetit të tyre.
Madje redaktimet në fjalë janë aplikuar edhe ndaj palëve, pra ekipeve mbrojtëse e po ashtu edhe ndaj publikut.
