Presidenti francez Emmanuel Macron ka kritikuar administratën e presidentit amerikan, Donald Trump, për sfidimin e rendit global, pas rrëzimit të presidentit venezuelian Nicolas Maduro dhe rinovimit të kërcënimeve për aneksimin e Grenlandës.
“Shtetet e Bashkuara janë një fuqi e konsoliduar që gradualisht po largohet nga disa prej aleatëve të saj dhe po shkëputet nga rregullat ndërkombëtare që dikur i promovonte,” tha Macron gjatë fjalimit të tij vjetor për politikën e jashtme.
Macron e shfrytëzoi këtë fjalim për të paraqitur një tablo të fuqive globale grabitqare që synojnë ta ndajnë botën në sfera ndikimi, me SHBA-në që dominon Hemisferën Perëndimore sipas të ashtuquajturës Doktrinë Donroe (versioni i Doktrinës Monroe e përshtatur për DONald Trump; DONroe). Megjithatë, ai shprehu edhe një ton pozitiv lidhur me përpjekjet diplomatike të Uashingtonit për t’i dhënë fund luftës në Ukrainë.
“Po kalojmë në një botë të fuqive të mëdha, ku ekziston një tundim real për ta copëtuar botën,” tha ai. “Ajo që ka ndodhur gjatë muajve të fundit, dhe edhe gjatë ditëve të fundit, nuk e zbeh këtë vlerësim.”
Presidenti francez fillimisht u përball me kritika për reagimin e tij pajtues ndaj rrëzimit të Maduros. Ai shkroi online se Venezuela “mund vetëm të gëzohet” për largimin e tij, duke mos përmendur nëse mënyra se si ndodhi ky largim shkelte të drejtën ndërkombëtare.
