I dërguari special i Bashkimit Evropian për dialogun Kosovë–Serbi, Peter Sorensen, ka shkruar për një vizitë përgatitore në Serbi, lidhur me dialogun Prishtinë–Beograd, të ëmëruar si një proces për “normalizimin e marrëdhënieve”.
Ai shkroi në platformën X se “i dëgjoi me kujdes bashkëbiseduesit e tij në Serbi”, duke shtuar se normalizimi i marrëdhënieve është i rëndësishëm për shkak të njerëzve në terren.
Sorensen ka njoftuar se ka zhvilluar takime përgatitore në Prishtinë dhe Beograd, në kuadër të përgatitjeve për takimet e ardhshme të dialogut.
“Pas vizitës sime në Prishtinë në fillim të gushtit, sot isha në Beograd për bisedime përgatitore për takimet e ardhshme në kuadër të dialogut. I dëgjova me kujdes bashkëbiseduesit e mi dhe theksova rëndësinë e normalizimit për hir të njerëzve në terren”, ka deklaruar Sorensen.
Dialogu është në një pauzë të gjatë, pasi në Kosovë ende nuk është formuar një qeveri e re, ndërkohë që edhe në Serbi situata politike është e tensionuar. Presidenti Aleksandër Vuçiq po përballet atje me protesta të mëdha.
