Albulena Haxhiu po thotë se “Gjykata ua grabiti kompetencat deputetëve”. Bash e kundërta është e vërtetë: Lëvizja Vetëvendosje, partia e kuqe jo veç me ngjyrë, por edhe me ideologji, është ajo që provoi grusht-shtetin duke tentuar t’ua marrë deputetëve të drejtën e votës.
Ajo sulmoi rëndë gjyqtarët e kushtetueses, por gjyqtari ideal i Albulena Haxhiut është, paramendoni, Vigan Qorrolli.
Një kolos i paditurisë njerëzore, njëherësh edhe i zënë duke vjedhur në provimin e jurisprudencës, i cili në serinë e përpjekjeve të papërmbajtshme për t’u bërë argat i Haxhiut në Kushtetuese, nuk e kurseu as lutjen për mbështetjen nga deputetët e Listës Serbe.
Është bash soji i species politike që ka micërruar grimcat e secilit pushtet të pas luftës, posaçërisht atij të PDK-së – për të cilën Mimoza Kusari e Milan Radojçiq bënë pazare tinëzare, duke e kurorëzuar praktikën ku gjyqtarët nuk zgjidhen sipas vullnetit të lirë të deputetëve, por sipas llogarive të Listës Serbe.
Pasi iu dështoi plani, partia VV e shpërbleu atë duke e bërë zëvendësministër. Mos të harrojmë, kjo kandidate anti-kushtetuese është një recidiviste e papërmirësueshme kundër rendit kushtetues në përpjekje për të realizuar synimin e hapur të Vetëvendosjes për ta instaluar sistemin e partisë-shtet.
Ky është një shembull i pastër që tregon se çfarë do të thotë grabitja e votës në Gjykatë Kushtetuese nga Haxhiu që ëndërronte të bëhej Kryeparlamentare me votim të fshehtë si mbulesë procedurale për tregtinë e votave.
E ndërkohë juristi i saj i preferuar është Blerim Sallahu, njëherësh zëvendësi tjetër i saj, i cili e ka borxh për t’ia sqaruar qytetarëve lidhjet me grupet e fajdes.
Dikush mbase edhe mund të pyes: “Si mund të gënjejnë pa u skuqur?”. Mirëpo tashmë krejt e njohim profilin e saj: një deputete vandale, një trafikante e bombolave të lotsjellësit, shkatërruese e sistemit të drejtësisë, arsyetuesja e paskrupullt para publikut e marrëveshjes Kurti-Vuçiq, e cila ia dha Serbisë Zajednicën, por pa njohje për Kosovën.
Çudia për mungesën e turpit prej bandave anti-shtet është naivitet vetëm për një copë kohë. Gjatë kësaj periudhe, qëllimi i partisë recidiviste kushtetuese është krijimi i një hutie të pafundme, e cila mbingarkon aftësinë tuaj për të menduar dhe për të bërë dallime nga e mira dhe e keqja, e drejta dhe e padrejta, e vërteta dhe pavërteta.
Kjo është çka bëjnë partitë autoritare nga Moska e deri në Karakas. Përveç atyre që bien viktima të këtij manipulimi ose bien në gropën e thellë të apatisë totale, të tjerët përfundojnë pjesëmarrës të drejtpërdrejtë në projektin e krijimit të partisë-shtet nëpërmjet pengmarrjes institucionale.
Për të realizuar këtë skenar të trishtë për kombin, gjithsesi do të dëgjoni Albulenën duke ligjëruar për grabitje të votës, ndërsa zhvatësit e parasë publike si Fitore Pacolli, postiere të mesazheve të Radojçiqit si Mimoza Kusari, apo sharlatanë që sfidojnë kufijtë e logjikës si Hekuran Murati, do lëshojnë rrënjë të thella në jetën institucionale të vendit.
