Ish-Zonja e Parë e SHBA-së, Jill Biden, thotë se kishte menduar se bashkëshorti i saj, Presidenti Joe Biden, po pësonte një goditje në tru gjatë debatit presidencial famëkeq të vitit 2024, ku ai pati një performancë të dobët.
“Isha e frikësuar, sepse nuk e kisha parë kurrë Joe-n ashtu më parë, e as më pas. Kurrë,” tha Jill Biden për CBS News, partnerin amerikan të BBC-së.
“Nuk e di çfarë ndodhi,” tha ajo. “Teksa e shikoja, mendova: ‘O Zot, ai po pëson goditje në tru.’ Dhe kjo më trembi për vdekje.”
Presidenti Biden u përball me presion të madh nga demokratët e tjerë që të tërhiqej si kandidat i tyre pas performancës së dobët në debat kundër kandidatit republikan të asaj kohe, Donald Trump. Biden përfundimisht u tërhoq nga gara dhe mbështeti zëvendëspresidenten e atëhershme, Kamala Harris.
Intervista e ish-Zonjës së Parë me Rita Braver në emisionin “CBS News Sunday Morning” do të transmetohet të dielën.
Jill Biden ka qëndruar pranë bashkëshortit të saj gjatë gjithë karrierës së tij shumëdekadëshe, nga koha kur ishte senator i Delaware-it deri në vitet e presidencës.
Ajo konsiderohej si një nga këshilltaret më me ndikim gjatë presidencës së tij dhe ndër personat që në fund e inkurajuan të tërhiqej nga gara e vitit 2024.
Pas debatit të qershorit 2024, disa muaj para zgjedhjeve presidenciale, demokratët shprehën shqetësim për performancën e pasigurt të presidentit në debat.
Fushata e Bidenit në atë kohë këmbëngulte se presidenti nuk do të tërhiqej si kandidat demokrat dhe se do të debatonte sërish me Donald Trumpin.
Gjatë debatit, ku të dy kërkonin një mandat të dytë, Biden dhe Trump u përplasën për tema madhore si emigracioni, ekonomia dhe të drejtat për abort.
Biden kishte zë të ngjirur, për të cilin ekipi i tij tha se vinte për shkak të një sëmundjeje, si dhe pati një moment ku dukej se humbi rrjedhën e mendimit.
Në një tubim pas debatit në Atlanta, Jill Biden e prezantoi bashkëshortin e saj në skenë dhe lavdëroi performancën e tij kundër Trumpit.
“Joe, bëre një punë kaq të mirë. U përgjigje në çdo pyetje. I dije të gjitha faktet,” i tha ajo turmës.
Por në anën tjetër, liderë dhe donatorë demokratë shprehën shqetësime për performancën e presidentit të atëhershëm. Edhe Kamala Harris, e cila rrallë e kritikonte publikisht Bidenin, pranoi se debati kishte pasur një “fillim të ngadaltë”.
Shqetësimet e votuesve për shëndetin, kthjelltësinë mendore dhe moshën e Bidenit — 81 vjeç në atë kohë — tashmë rëndonin shumë mbi debatin.
Paraqitja e Bidenit në debat u bë temë kryesore e shqyrtimit në mediat amerikane, ku u ngritën pikëpyetje për aftësinë e tij për të ushtruar detyrën e presidentit, si dhe për shanset e tij në zgjedhjet e nëntorit 2024.
Konsiderohej pak e mundshme që Biden, presidenti në detyrë, të zëvendësohej si kandidat i Partisë Demokratike vetëm pak muaj para zgjedhjeve. Procesi i vështirë i zgjedhjes së një kandidati tjetër shihej si diçka që mund ta dëmtonte garën e partisë për Shtëpinë e Bardhë.
Por performanca e tij në debat — së bashku me gafat gjatë një samiti të NATO-s në javët pasuese dhe paraqitjen e dobët fizike pas një diagnoze me Covid — përfundimisht çuan në përfundimin e kandidaturës së tij.
Harris mori nominimin demokrat rreth tre muaj para zgjedhjeve dhe në fund humbi garën kundër Trumpit.
Pas humbjes në zgjedhje, Harris kritikoi ish-shefin e saj, duke e quajtur vendimin e Bidenit për të kërkuar një mandat të dytë “pakujdesi”.
“‘Është vendimi i Joe dhe Jill.’ Të gjithë e thoshim këtë si një mantra, sikur të ishim hipnotizuar,” shkroi Harris në kujtimet e saj. “Ishte hir, apo ishte pakujdesi? Duke e parë pas, mendoj se ishte pakujdesi.”









