Që nga ora 09:30 e mëngjesit, kryetari i Mitrovicës së Jugut, Faton Peci, është intervistuar në Prokurorinë Speciale.
Siç konfirmoi për VOX Kosova zëdhënësja e Prokurorisë Speciale, Arbnora Luta, intervistimi i tij ka të bëjë me dyshimet për keqpërdorime në dhënien e granteve.
“Ju njoftojmë se z. Faton Peci është intervistuar në cilësinë e të pandehurit në rastin e granteve,i cili është në trajtim nga Prokuroria Speciale e Republikës së Kosovës”, tha ajo.
VOX Kosova mëson se hetimet janë përqendruar edhe në dhënien e granteve për familjarë të deputetes së zgjedhur të VV-së, Fitore Pacolli, por edhe grante tjera që kanë lidhje me zyrtarë të afërt me Faton Pecin.
Burimet e VOX Kosova gjithashtu thanë se gjatë këtyre ditëve janë intervistuar në cilësi të dëshmitarëve edhe zyrtarë të Agjencisë për Zhvillimin e Bujqësisë.
Në nëntor të vitit 2024, ishte kuptuar se Ministria e Bujqësisë nën drejtimin e Faton Pecit u kishte dhënë grante dajës dhe vëllaut të Fitore Pacollit, e cila në atë kohë mbante pozitën e Kryetares së Komisionit Parlamentar për Bujqësi.
Përveç saj, grant kishte fituar edhe Naim Huruglica, ish-këshilltar i Pecit.
