Sekretarja e Përgjithshme e Partisë Demokratike të Kosovës, Vlora Çitaku, ka thënë se zgjedhjet e reja parlamentare mund të mbahen në fund të vitit 2025.
Çitaku, thotë se fillimisht duhet pritur vendimi i Gjykatës Kushtetuese për hapat e ardhshëm që duhet t’i marrë Kuvendi i Kosovës, por teknikisht zgjedhjet nuk mund të zhvillohen para përfundimit të balotazhit për zgjedhjet lokale.
“Në momentin në të cilin jemi, konsideroj që zgjedhjet e reja parlamentare janë të pashmangshme. Do të jetë teknikisht e pamundur që zgjedhjet e reja parlamentare të organizohen para përfundimit të balotazhit [për zgjedhjet lokale]. Zgjedhjet e reja parlamentare, natyrisht, në bazë të afateve kalendarike, mund të ndodhin kah fundi i vitit”, ka thënë Çitaku, në një intervistë për KosovaPress.
Sipas saj, zgjedhjet e reja janë bërë “të pashmangshme”. “Është humbur shumë kohë. Zoti Kurti i ka humbur Kosovës jo vetëm muajt e fundit, por vite të tëra”, shtoi ajo.
