Emmanuel Macron dhe gruaja e tij, Brigitte, kanë bërë padi për shpifje kundër amerikanes të djathtë që merret me podcast-e, e cila kishte thënë se gruaja e Presidentit francez ka qenë burrë.
Padia prej 218 faqesh kundër Candace Owens, që ka me miliona ndjekës në X dhe YouTube, është dorëzuar nga Makronët në Gjykatën Supreme të Delaware të mërkurën dhe kërkon gjykim.
Në një deklaratë, lëshuar nga avokati i tyre, Makronët thonë se kanë përpiluar një padi pasi Owens në mënyrë të përsëritshme ka injoruar kërkesa për të ndalur dhe fshirë deklarata falso dhe shpifëse të bëra në një seri me tetë pjesë të një podcast-i publikuar në Youtube dhe titulluar Becoming Brigitte.
Sipas Makronëve, seria shpërndau “gënjeshtra të verifikueshme dhe të dëmshme”, përfshirë Brigitte që vodhi identitetin e dikujt tjetër dhe u kthye në femër, si dhe që Makronët janë të afërm gjaku duke kryer kështu incest.
Padia e tyre sqaron rrethanat në të cilat ata janë takuar, kur tani Presidenti 47-vjeçar ishte nxënës në shkollë të mesme dhe Brigitte mësimdhënëse. Aty thuhet se marrëdhënia e tyre “qëndroi përbrenda kufijve të ligjit”.
“Kampanja shpifëse e Owens ishte dizajnuar për të na sulmuar dhe shkaktuar dhimbje neve dhe familjes, si dhe për të përfituar vëmendje e famë të keqe,” kanë thënë Makronët.
Në podcast-in e saj të mërkurën, Owens tha “Kjo padi është e ndotur me pasaktësi faktike” dhe pjesë e një “strategjie të qartë për marrëdhënie me publikun” për të njollosur karakterin e saj.
