Ministrja në detyrë e Punëve të Jashtme, Donika Gërvalla ka kërcënuar sot me padi “të gjithë ata që thonë se ajo ka dërguar dosje në Gjykatën Speciale”. Pavarësisht se në vitin 2016, ajo e thoshte vetë një gjë të tillë, sot u shfaq e nervozuar duke kërkuar që për këtë temë, të pyetet tek avokatët e krerëve të UÇK-së.
“Është bërë bozë kjo temë. Gjykata Speciale në Hagë e ka përmbyllur marrjen në pyetje të dëshmitarëve. Pyetini avokatët e të akuzuarve, ku figuron emri im. Pyesni avokatët e të akuzuarve, në cilën fletë, në cilën dëshmi figuron emri im. Është keq kur edhe fushatën kundër një ministri e bazon tërësisht në gënjeshtra. Pra, sot e tutje, do të marr hapa ligjorë kundër secilit që pretendon publikisht që unë kam dërguar dëshmi në Hagë, ose që kam qenë dëshmitare në Hagë”, tha ajo.
Në vitin 2016, në një paraqitje televizive në RTV Dukagjini, Gërvalla thoshte “se patjetër se do të dorëzonte dosje në Hagë”, dhe dyshimi i vetëm që paraqiste ishte se “s’e di nëse do të merren parasysh”. Madje thoshte se me krerët e UÇK-së, të cilët i quante “kriminelë”, duhet të merret pikërisht Gjykata Speciale.
