Të paktën 10 persona janë vrarë gjatë protestave në Kenia, sipas një institucioni shtetëror për të drejtat e njeriut – bilanci më i fundit i një vale demonstratash antiqeveritare që ka nisur që nga viti i kaluar.
Policia hapi zjarr ndaj protestuesve, dhe më herët, Dr. Aron Sikuku, mjek në Eagle Nursing Home në Kangemi, në periferi të Nairobit, i tha BBC-së se dy trupa të pajetë ishin sjellë në institucionin ku ai punon dhe kishin ndërruar jetë si pasojë e plagëve me armë zjarri.
Ai tha se qindra protestues ishin mbledhur jashtë spitalit të tij, duke kërkuar që trupat t’u dorëzoheshin.
Këto demonstrata përkojnë me 35-vjetorin e protestave historike “Saba Saba” (që do të thotë “shtatë-shtatë”) të 7 korrikut 1990, që shënuan nisjen e lëvizjes për demokraci shumëpartiake në Kenia.
Në një raport kritik, Komisioni Kombëtar i të Drejtave të Njeriut i Kenias (KHRC), që është një organ shtetëror, akuzoi policinë për përdorim të forcës së tepruar, siç ka ndodhur shpesh gjatë kësaj vale protestash.
“Policia veproi me rroba civile dhe automjete pa shenja zyrtare” të hënën dhe bashkëpunoi me “grupe kriminale të armatosura në Nairobi, Kajiado, Nakuru, Kiambu dhe Eldoret”, thuhej në raport. Policia ka mohuar më herët akuza të tilla.
Raporti shton gjithashtu se ka prova se të paktën dy persona janë rrëmbyer, ndërsa janë raportuar 29 të plagosur dhe 37 të arrestuar në qytete të ndryshme në mbarë vendin.
Policia u përpoq t’i paraprinte protestave duke bllokuar qendrën e Nairobit.
Që herët në mëngjes, qindra udhëtarë dhe pasagjerë që kishin mbërritur gjatë natës mbetën të bllokuar në pikat e kontrollit, disa prej tyre më shumë se 10 kilometra nga qendra e qytetit, me vetëm pak automjete që lejoheshin të kalonin.
Rrugët që çonin drejt institucioneve kryesore shtetërore – përfshirë rezidencën zyrtare të presidentit, State House, dhe parlamentin kenian – ishin të rrethuara me tela me gjemba.
Sipas gazetës kryesore të këtij vendit, Nation, protestat janë përhapur në 17 nga 47 qarqet e Kenias.
