Protestues nga një lëvizje e re në Francë kanë organizuar demonstrata në rrugë duke bllokuar trafikun të mërkurën në mëngjes dhe një duzinë njerëzish janë arrestuar ndërsa forcat e sigurisë janë vendosur nëpër krejt vendin, kanë thënë zyrtarë francezë.
Informacione rreth demonstratave “Blloko Gjithçka” u lëshuan në rrjete sociale gjatë verës, duke ngritur krahasime me protestat “Jeleku i Verdhë” më 2018, që fillimisht filluan si pasojë e çmimeve të larta të karburanteve e më pas u rritën në një lëvizje më të gjerë kundër presidentit francez, Emmanuel Macron dhe planeve të tij për reformën ekonomike.
Anëtarë të Lëvizjes “Blloko Gjithçka”, për të cilën analistët dhe zyrtarët francezë thonë se nisi mes grupeve të krahut të djathtë para se të futej në kontrollin e të majtëve dhe ekstremistëve të majtë, kanë thënë se ata konsiderojnë që sistemi politik nuk është më i përshtatshëm për asnjë qëllim.
Këto demonstrata mund të thellojnë krizën politike të Francës pasi vetëm dy ditë më parë parlamenti rrëzoi qeverinë e François Bayrou nëpërmjet një votëbesimi. Të martën, Macron emëroi Sebastien Lecornu si kryeministrin e tij të pestë në më pak se dy vjet.
Partia e ekstremit të majtë “Të Papërkulurit” veç se kanë thënë se do të prezantojnë një mocion votëbesim kundër Lecornu, edhe pse e djathta ekstreme “Marshi Kombëtar” kanë sinjalizuar se janë të gatshëm të punojnë me të tani për tani.
