Lëvizja Vetëvendosje dhe eksponentë të saj, derisa Gjykata Kushtetuese e Kosovës po shqyrtonte lëndën rreth nënkryetarit të Kuvendit të Kosovës nga radhët e komunitet serb, thoshte se ka rrezik që Lista Serbe të ketë veto në institucione.
Por, këto pretendime ka rrëzuar Gjykata Kushtetuese sot pasi ka publikuar Aktgjykimin e plotë për çështjen e mos zgjedhjes së nënkryetarit të Kuvendit nga komuniteti serb.
Në të thuhet se ka raste kur Kuvendi mund të funksionojë ose konstituohet edhe pa zgjedhjen e një nënkryetari.
Në nenit 148 të aktgjykimit thuhet se Kuvendi mund të konstituohet edhe pa zgjedhjen e nënkryetarit nga komuniteti serb, nëse grupi parlamentar serb refuzon të ushtrojë të drejtën kushtetuese për të propozuar anëtarin e Kryesisë së Kuvendit.
“Pavarësisht konkluzionit të lartcekur, Gjykata sqaron se në rastet kur e drejta kushtetuese në procedurën e zgjedhjes së anëtarëve të Kryesisë së Kuvendit gjatë konstituimit të Kuvendit nuk ushtrohet nga deputetët apo grupet parlamentare, që kanë të drejtë të propozojnë anëtarë të Kryesisë së Kuvendit, qofshin ato nga komuniteti shumicë apo nga radhët e komuniteteve që nuk janë shumicë, të cilat mund të manifestohen në pengimin e këtij procesi, apo në rastet kur, përkundër vullnetit të shumicës së deputetëve për të zgjedhur anëtarin e Kryesisë, Kuvendit i pamundësohet zgjedhja e anëtarëve të Kryesisë së saj, Kuvendi përjashtimisht, do të mund të vazhdojë funksionimin edhe pa njërin nga anëtarët e Kryesisë së Kuvendit, me kushtin që Kryesia e Kuvendit të ketë kuorum në vendimmarrjen e saj në përputhje me paragrafin 3 të nenit 20 (Mbledhja e Kryesisë) të Rregullores së Kuvendit, i cili përcakton se: “Vendimi i Kryesisë merret me shumicën e anëtarëve të pranishëm në mbledhje.” Megjithatë, Gjykata thekson se ky nuk është rasti në rrethanat konkrete sepse dështimi për konstituimin e Kuvendit në rastin e tanishëm i atribuohet mosvotimit të shumicës së deputetëve të zgjedhur të Kuvendit, për kandidatët e propozuar, qoftë (i) të propozuar drejtpërdrejt nga radhët e deputetëve të komuniteteve që nuk janë shumicë, respektivisht komunitetit Serb; ose (ii) përmes procedurës së shortit.
