Mëngjesin e së hënës, sulmet nga Teherani kanë goditur një rafineri të naftës në Izrael duke dëmtuar kështu një pjesë të rrjetit elektrik.
CNN raporton se numri i viktimave dhe të plagosurve është në rritje nga momenti në moment.
Të premten, Izraeli goditi 100 caqe në Iran, përfshirë objekte bërthamore dhe baza raketash si dhe duke vrarë komandantë të lartë dhe shkencëtarë.
Pamjet satelitore treguan dëme të konsiderueshme në objektin bërthamor të Natanz, një nga asetet më të rëndësishme nukleare iraniane.
Sulmet nga Izraeli vazhduan edhe gjatë fundjavës gjersa u shënjestruan mbrojtjet ajrore përreth Teheranit.
Sipas ushtrisë izraelite, në sulmet e fundjavës, u goditën 80 objektiva.
Ministria e Shëndetësisë në Teheran raporton për të paktën 224 persona të vrarë që nga e premtja.
Në të njëjtën kohë është kundërpërgjigjur edhe Irani.
Forcat ushtarake, në drejtim të Izraelit kanë lëshuar disa raketa në zona të ndryshme si pasojë e të cilave deri tash thuhet se janë 14 të vrarë e 390 të plagosur.
Të shtunën vonë, ekipet e shpëtimit thanë se një sulm nga Irani shkatërroi një ndërtesë trekatëshe në qytetin Tamra, duke vrarë katër gra.
Në një sulm tjetër pranë Tel Avivit, u vranë gjashtë dhe u plagosën të paktën 180 izraelitë.
Numri i viktimave pritet të rritet pasi raketat nga Irani goditën të hënën sërish Tel Avivin dhe Haifën, me zjarre intensive në një termocentral në qytetin verior.
