Më 24 shkurt të vitit 2026 do të fillojë gjyqi i ri kundër ish-presidentit Hashim Thaçi, në rastin ku ai dhe Hajredin Kuçi, Bashkim Smakaj, Fadil Fazliu dhe Isni Kilaj akuzohen për pengim të drejtësisë. Vendimi është marrë dje nga gjyqtari Christopher Gosnell.
Prokuroria përmes shkresës që ka parë VOX Kosova, ka bërë me dije se do të thërrasë tre dëshmitarë dhe se gjyqi mund të përfundojë brenda dy javësh. Ndërkohë s’ka detaje nga mbrojtja e të akuzuarve nëse do të ketë individë që do të thirren gjatë çështjes së mbrojtjes.
Sipas Aktakuzës së Speciales,, midis 12 prillit 2023 dhe 2 nëntorit 2023, gjatë vizitave jo të privilegjuara në objektin e paraburgimit, Hashim Thaçi u dha Smakajt, Kilajt, Fazliut dhe Kuçit informacion konfidencial në lidhje me dëshmitarë të ZPS-së, udhëzime për të ndikuar në dëshmitë e dëshmitarëve të ZPS-së dhe hollësi se si duhej ta bënin këtë.
Në aktakuzë më tej pretendohet se Thaçi “bashkërendoi tri grupe të veçanta, të formuara me Smakajn, me Fazliun dhe me Kilajn, dhe persona të tjerë kundër të cilëve nuk janë ngritur akuza, si dhe me Kuçin, me synimin për të ndikuar në dëshmitë e dëshmitarëve të ZPS-së në kontekstin e gjykimit aktual për krime lufte Thaçi dhe të tjerët”.
Ndaj ish-presidentit rëndojnë gjithësej 11 akuza.
