Presidentja Vjosa Osmani, në intervistën e dhënë për Syri TV, ka konfirmuar se të gjithë aktorët e Vetëvendosjes, përfshirë Kryeministrin Kurti, janë pajtuar se vendi mund të shkojë në zgjedhje nëse deri më 5 mars nuk emërohet Presidenti.
Ajo potencoi se Kryeministri Kurti, në takime mes tyre, është zotuar se do ta përkrahte për një mandat të dytë.
“Kam dashur të kandidoj, për shkak të punës, veçanërisht në Politikën e Jashtme, arsyeja e dytë ka qenë zotimi i vetë i zotit Kurti se do më përkrahte në një kauzë të tillë, e cila është në interes të Kosovës, duke e kualifikuar vetë që bashkimi ynë si binom është diçka për të cilën ka nevojë Republika jonë akoma. Më ka thënë Presidentja më e mirë e shekullit 21” tha Osmani.
Osmani theksoi se nuk ka frikë nga mundësia që Gjykata Kushtetuese ta rrezojë dekretin e saj, duke nënvizuar pavarësinë e institucioneve të drejtësisë:
“Gjykata do duhej të ishte e lirë. Unë shpresoj që askush të mos ushtrojë presion mbi Gjykatën, sepse ky është vërtetë një vendim i rëndësishëm, dhe sikur unë mos ta nxirrja dekretin tim, Gjykata nuk do të kishte mundësi të merrte vendim vetëm në bazë të lëndës që është dërguar nga Lëvizja Vetëvendosje, një natë më parë rreth mesnatës, për shkak se ajo nuk ka objekt, sepse s’kishte vendim të Kuvendit për t’u shqyrtuar,” ka thënë Osmani.
Osmani shtoi se respekton çdo vendim të Gjykatës Kushtetuese, duke theksuar besimin e saj në institucionet kushtetuese të vendit.
“Nuk jam Pejgamber, andaj ekziston Gjykata Kushtetuese, dhe është normale që institucionet të kenë interpretime të ndryshme për çështje të caktuara,” ka thënë ndër të tjera Osmani.
