Presidentja e Kosovës, Vjosa Osmani, ka thënë se rreshteri i Policisë së Kosovës, Afrim Bunjaku, ka rënë hero në Banjskë, duke mbrojtur lirinë dhe dinjitetin e Kosovës, duke shtuar se asnjë agresion i Serbisë s’mund ta ndalë të vërtetën e Kosovës si shtet sovran.
“24 shtatori na kujton se liria kërkon sakrificë, por edhe se Kosova është e pathyeshme. Asnjë sulm terrorist e agresion nga Serbia nuk mund ta ndalë të vërtetën. Kosova shtet sovran, i lirë e i pandashëm do të mbetet realitet i pakthyeshëm e i përjetshëm”, shkroi Osmani në rrjetin social Facebook.
Dy vjet më parë, më 24 shtator 2023, një grup paramilitarësh serbë, të udhëhequr nga kryekrimineli Milan Radoijçiç, sulmoi Policinë e Kosovës në fshatin Banjskë të Zveçanit – me synim aneksimin e Veriut të vendit.
Në këtë sulm, mbeti i vrarë rreshteri Afrim Bunjaku, dhe u plagos një tjetër. Gjatë përleshjeve mes Policisë së Kosovës dhe terroristëve serbë më pas mbetën të vrarë tre kriminelë serbë.
