“E kemi kundërshtuar kur ka qenë koha”, ka thënë Ministri në detyrë i Financave, Hekuran Murati, kur është pyetur për heshtjen e Lëvizjes Vetëvendosje në raport me Gjykatën Speciale, pas ankesave për padrejtësi në procesin e gjykimit të ish-krerëve të UÇK-së.
Këto komente, Murati i bëri në një konferencë për media pas mbledhjes së Qeverisë, kur u pyet se pse VV-ja nuk po e thotë asnjë fjalë për Gjykatën Speciale edhe pas ankesave që të akuzuarit i kanë bërë për shkelje të të drejtave të tyre, ndërsa në anën tjetër kritikojnë vazhdimisht sistemin e drejtësisë në Kosovë.
“Kemi bërë lutje, kemi bërë kërkesa, ka fjalime të panumërta të deputetëve të Vetëvendosjes – që si opozitë kishte paralajmëruar këto që po ndodhin”, tha Murati.
Sipas tij, “kundërshtimi është bërë kur ka qenë koha dhe kur ka qenë nevoja. “Pikërisht atëherë ne jemi quajtur persona që po duam të bëjmë pengesa, jemi kundër shtetit të Kosovës, por që ajo është e kaluar”.
“Andaj edhe njëherë po e ritheksoj që qëndrimet tona kanë qenë konsistente për gjatë gjithë kohës dhe e kemi dëshmuar këtë dhe koha po e dëshmon”.
