Ushtria amerikane njoftoi se Uashingtoni dhe Moska ranë dakord të enjten të rivendosin dialogun ushtarak në nivel të lartë mes dy vendeve, pas bisedimeve të zhvilluara në Abu Dhabi, një hap që mund të sinjalizojë drejt normalizimit të disa marrëdhënieve mes Shteteve të Bashkuara dhe Rusisë.
Shtetet e Bashkuara i kishin ndërprerë komunikimet ushtarake me Moskën pak para se Rusia të pushtonte Ukrainën. Konflikti, i cili filloi në vitin 2022, është lufta më vdekjeprurëse në Evropë që nga Lufta e Dytë Botërore dhe përballja më e madhe mes Moskës dhe Perëndimit që nga kulmi i Luftës së Ftohtë.
Në një deklaratë, ushtria amerikane tha se qëllimi i rivendosjes së këtij mekanizmi është shmangia e keqllogaritjeve dhe përshkallëzimit nga cilado palë.
“Mbajtja e dialogut mes ushtrive është një faktor i rëndësishëm për stabilitetin dhe paqen globale, e cila mund të arrihet vetëm përmes forcës, dhe ofron një mjet për rritjen e transparencës dhe uljen e tensioneve,” thuhet në deklaratë.
Rivendosja e dialogut vjen pasi komandanti i Komandës Evropiane të SHBA-së, gjenerali Alexus Grynkewich, zhvilloi bisedime me zyrtarë të lartë ushtarakë rusë dhe ukrainas në Abu Dhabi.
Edhe pasi bisedimet ushtarake në nivel të lartë mes Shteteve të Bashkuara dhe Rusisë u ndërprenë, palët mbajtën një linjë emergjente për shmangien e përplasjeve.
Presidenti amerikan Donald Trump dhe presidenti rus Vladimir Putin kanë komunikuar drejtpërdrejt me njëri-tjetrin në disa raste.
