Pakistani dhe Afganistani thanë se po pezullojnë operacionet e tyre ushtarake kundër njëri-tjetrit të mërkurën për festën islame të Fitër Bajramit, një lëvizje e papritur dy ditë pasi një qendër rehabilitimi për varësinë nga droga në Kabul u godit në sulmin më vdekjeprurës të muajve të fundit.
Qeveria e Talibanëve në Afganistan ka thënë se më shumë se 400 persona u vranë dhe 265 u plagosën në sulmin ajror që ndodhi të hënën në mbrëmje, pikërisht kur njerëzit dhe stafi në qendër po faleshin.
Shifrat e viktimave të dhëna nga autoritetet nuk janë verifikuar në mënyrë të pavarur. Misioni i Asistimit i Kombeve të Bashkuara në Afganistan tha të mërkurën se 143 persona u vranë dhe 119 u plagosën në sulm.
Pakistani hodhi poshtë deklaratat e talibanëve për sulmin, duke thënë se kishte “goditur me saktësi instalime ushtarake dhe infrastrukturë mbështetëse të terrorizmit”.
PEZULLIMI SI GJEST MIRËBESIMI, THOTË PAKISTANI
Ministri i Informacionit i Pakistanit, Attaullah Tarar, tha se Islamabadi po i pezullon operacionet ushtarake për shkak të Bajramit, që shënon fundin e muajit të shenjtë të Ramazanit dhe pritet të festohet në fund të kësaj jave.
Ai tha në një postim në X se pezullimi është bërë me iniciativë të vetë Pakistanit dhe me kërkesë të vendeve islame si Arabia Saudite, Katari dhe Turqia. Pezullimi hyn në fuqi në mesnatën e së mërkurës dhe zgjat deri në mesnatën e 23 marsit.
“Pakistani e ofron këtë gjest me mirëbesim dhe në përputhje me normat islame,” tha ai, duke shtuar se operacionet do të rifillojnë me intensitet të shtuar nëse ka ndonjë sulm ndërkufitar, sulm me dron apo ndonjë incident “terrorist” brenda Pakistanit.
Talibanët afganë bënë një njoftim të ngjashëm pak më vonë. Zëdhënësi i qeverisë talibane, Zabiullah Mujahid, tha se Kabuli po pezullon përkohësisht operacionet mbrojtëse me rastin e Bajramit dhe me kërkesë të Arabisë Saudite, Turqisë dhe Katarit.
Afganistani do të përgjigjet ndaj çdo agresioni në rast kërcënimi, shtoi ai.
Tarar tha gjithashtu se deri më tani 707 persona janë vrarë nga veprimet e Pakistanit kundër Afganistanit. Të dyja palët kanë pretenduar rregullisht se i kanë shkaktuar dëme të mëdha njëra-tjetrës, por verifikimi i pavarur nuk ka qenë i mundur.









