Shqipëria ka hapur katër kapituj të rinj të negociatave për anëtarësim në Bashkimin Evropian. Ndërsa, pritet që edhe pesë të tjerë të hapen brenda këtij viti, të cilët janë grupkapitujt e fundit.
Kjo u njoftua gjatë një vizite që Kryeministri i Shqipërisë, Edi Rama, pati në Bruksel, ku u takua me Komisioneren e BE-së për Zgjerim, Marta Kos, me të cilën mbajti ceremoninë e hapjes së këtyre katër kapitujve.
Ishte Kos që njoftoi se brenda këtij viti, Shqipëria do t’i hapë edhe pesë kapitujt e mbetur.
“Dhe, sigurisht, do ta bëjmë brenda këtij viti, sipas planit dhe e mbështes fort planin tuaj për të mbyllur negociatat, që do të thotë, të jenë të gjitha me ngjyrë të gjelbër deri në vitin 2027 dhe, pastaj, sigurisht, t’ju kemi në BE sa më shpejt të jetë e mundur”, tha ajo.
Rama, nga ana tjetër deklaroi se Shqipëria do të vazhdojë angazhimin maksimal për të përmbushur objektivat për anëtarësim në BE.
“Nderi është i gjithi i yni. Edhe unë dua të falënderoj ekipin tuaj në Shqipëri, që na rri gjithmonë mbi kokë, për t’u siguruar që të mos shpërqendrohemi dhe që të mos mendojmë në përmasë më të madhe për veten nga ç’duhet”, pohoi Rama.
Këta katër kapituj që u hapën të martën, iu shtuan 24 të tjerëve të hapur në 11 muajt e fundit të këtij procesi.
