Provat e pranuara nga Serbia në Prokurorinë Speciale të Hagës kanë ngritur alarmin te krerët e UÇK-së që po akuzohen për krime lufte.
Bashkërisht ata kanë dërguar në Gjykatë një mocion për rrëzimin e disa materialeve dhe dokumenteve të ardhura nga organe shtetërore serbe, e të cilat thuhen se i përkasin periudhës së luftës.
Avokatët e Hashim Thaçit, Kadri Veselit, Jakup Krasniqit e Rexhep Selimit, kanë argumentuar se shumica e provave nga Serbia janë dëshmuar se janë siguruar si rrjedhojë e operacioneve “me flamur të rremë”, torturave dhe manipulimeve të vendeve të krimit.
“Prokuroria paraqet prova të shumta të propozuara që përbëhen nga raporte, urdhra dhe dokumente të tjera që vijnë nga Serbia. Mbrojtja kujton provat se Serbia ka kryer operacione me flamur të rremë, ka manipuluar vendet e krimit dhe ka siguruar dëshmi të rreme përmes torturës dhe presionit, duke ngritur shqetësime të bazuara në lidhje me besueshmërinë e çdo informacioni që buron nga aktorët e saj shtetërorë”, theksojnë avokatët në shkresën e tyre.
Por, verifikime mbi vërtetësinë e materialeve në fjalë të ardhura nga Beogradi nuk u bënë.
Prokuroria e Speciales në Gjykatë çoi dokumente, në këtë rast urdhra dhe raporte që si burim informacioni kanë Serbinë, dhe nuk e ballafaqoi kredibilitetin e tyre me dëshmitarët përkatës.
“Në vend të kësaj, Prokuroria i bazon parashtrimet e saj në vërtetësi vetëm në faktin se raportet kanë “një format në përputhje me Vendimet ose Raportet e tjera bashkëkohore” – ku dokumentet e përdorura për krahasim shpesh janë vetë dokumente të paautorizuara të ofruara në të njëjtin mocion”, shton tutje mbrojtja.
Të gjendur përballë kësaj situate, Hashim Thaçi, Kadri Veseli, Rexhep Selimi e Jakup Krasniqi janë bërë edhe një herë bashkë në një kërkesë të vetme.
Ata i kanë bërë thirrje Trupit Gjykues që të ketë kujdes në vlerësimin e provave të ardhura nga Serbia, duke ia rikujtuar faktin se për to nuk është përdorur asnjë masë e vlerësimit të vërtetësisë.
Për më tepër, edhe dëshmitarët që do të mund të pohonin apo mohonin këto dokumente nuk janë thirrur në gjyq nga organi i akuzës.
