Kryeministri në detyrë i Kosovës, Albin Kurti, komentoi vendimin e Gjykatës Kushtetuese lidhur me konstituimin e Kuvendit, duke e quajtur mosfunksionimin e tij një humbje kohe dhe dëm për shtetin. Ai ka thënë se Kushtetuesja nuk mund ta anulojë votimin për Emilja Rexhepin, derisa ka kritikuar opozitën për mosvotimin e Nenad Rashiç-it.
“Sa i përket aktgjykimit të Gjykatës Kushtetuese, ne duhet ta shohim atë në mënyrë të plotë për të dhënë vlerësimin tonë, por ajo që mund të them tani është se konsideroj që është humbje kohe dhe dëm që nuk po funksionon Kuvendi i Republikës së Kosovës”, tha Kurti para gazetarëve.
Ai shtoi se Kuvendi ka zgjedhur kryetarin Dimal Basha dhe katër nënkryetarët: Albulena Haxhiu, Vlora Çitaku, Kujtim Shala dhe Emilja Rexhepi. “Askush nuk është duke e zënë karrigen e zbrazët për nënkryetarin nga radhët e komunitetit serb. Është dashur të vazhdoj puna e Kuvendit sepse shteti i Kosovës nuk ka kohë për të humbur”.
Kurti pohoi se Kushtetuesja nuk mund të anulojë votimin për nënkryetaren nga radhët e komunitetit jo shumicë serb, Emilja Rexhepi. “Është nënkryetare e Kuvendit, nuk mundet votimi për Emilja Rexhepin të anulohet. Prandaj ne kemi ngelur vetëm te nënkryetari i fundit nga komuniteti serb. Por mos harroni, nuk janë serbë vetëm ata të Listës Serbe, serb është edhe Nenad Rashiç”.
Kryeministri kritikoi gjithashtu opozitën për mosvotimin e deputetit nga komuniteti jo shumicë serb, Rashiç, për postin e nënkryetarit të Kuvendit. “Në njërën anë përfaqësuesi i Listës Serbe i mori vetëm 10 vota, e Nenad Rashiç 56. Vetëm pesë vota t’ia jepnin këta 52 që janë të opozitës, sot nuk ishim duke i bërë këto pyetje dhe këto përgjigje”, shtoi.
