Policia e Kosovës në bashkëpunim me Prokurorinë Themelore në Mitrovicë ka realizuar një aksion policor në Vushtrri, ku janë arrestuar katër persona. Ata dyshohet se kanë kryer veprat penale “Detyrimi”, “Lëndimi i lehtë trupor” dhe “Arratisja e personave të privuar nga liria”.
Sipas komunikatës për media, janë kontrolluar dy lokacione në fshatin Ropicë të Vushtrrisë dhe një tjetër në qytetin e Vushtrrisë.
“Nga ky operacion policor janë arrestuar tre (3) persona lidhur me dyshimin e kryerjes së veprës penale ‘Detyrimi’, si dhe një (1) person i cili ka qenë në arrati për veprat penale ‘Lëndimi i lehtë trupor’ dhe ‘Arratisja e personave të privuar nga liria’, thuhet në komunikatën për media të Prokurorisë.
Me vendim të prokurorit, katër të pandehurit janë ndaluar për 48 orë dhe potencohet se operacioni është duke vazhduar.
