Dy persona të dyshuar për veprën penale “Falsifikim i Parasë” janë arrestuar, të martën, ka njoftuar Prokuroria e Kosovës.
Hetuesit policorë nga Drejtoria për Hetimin e Krimeve Ekonomike dhe Korrupsionit, pas hetimeve disa mujore, në bazë të urdhrit të lëshuar nga Gjykata Themelore në Prishtinë dhe nën udhëheqjen e Prokurorisë Speciale të Kosovës, kanë zhvilluar një operacion policor në Prishtinë.
Në bashkëpunim me Njësinë e Reagimit të Shpejtë të Policisë së Kosovës, është ndaluar një veturë në të cilën gjendeshin dy personat e dyshuar, S.T dhe A.TH
Në njoftim theksohet se pas kontrollit të ushtruar, janë gjetur dhe sekuestruar para të falsifikuara në valutën euro, në shumën totale prej 40 mijë euro, të cilat gjatë testimit fillestar kanë rezultuar se janë të falsifikuara.
“Hetuesit kanë kryer kontrolle edhe në dy lokacione: në shtëpitë dhe objektet përcjellëse të banimit të personave të dyshuar”, thuhet aty.
Prokuroria Speciale e Kosovës, në koordinim me Policinë e Kosovës, thuhet se është duke i ndërmarrë të gjitha veprimet e nevojshme hetimore në përputhje me dispozitat e Kodit të Procedurës Penale.
