Kryetari i Partisë Demokratike të Kosovës (PDK), Memli Krasniqi, ka bërë të ditur se gjatë kësaj jave do ta dërgojnë në Gjykatën Kushtetuese vendimin e Zyrës së Rregullatorit për Energji (ZRRE) për liberalizimin e tregut të energjisë.
“Në konsultim me Avokatin Faton Fetahu dhe ekipin e juristëve të PDK-së, kemi konstatuar se tashmë janë përmbushur të gjitha kushtet ligjore që ky vendim i ZRRE-së të ankimohet në Gjykatën Kushtetuese, gjë që do ta bëjmë gjatë kësaj jave”, ka njoftuar Krasniqi në .
Kreu i PDK-së potencoi se do të kërkojnë masë të përkohshme, “në mënyrë që ky vendim i dëmshëm të mos zbatohet deri në shqyrtimin përfundimtar të çështjes”. “Ky nuk është vetëm një proces gjyqësor. Është një betejë për të mbrojtur bizneset tona, ekonominë e vendit, punëtorët tanë dhe familjet e tyre nga një abuzim i pashembullt i pushtetit…”, shtoi.
Më 12 gusht, shkalla e dytë e Gjykatës Komerciale mori vendim që i dha të drejtë ZRRE-së për liberalizimin e tregut të energjisë. Sipas vendimit të ZRRE-së, të gjitha bizneset që kanë më shumë se 50 punëtorë, janë detyruar të kalojnë në tregun e hapur të energjisë. Ky vendim i përfshin rreth 1300 biznese.
Të shtunën, Kompania për shpërndarjen e energjisë elektrike, KEDS, bëri me dije se ka nisur shkyçjet masive të bizneseve që nuk kanë dalë në tregun e lirë. KEDS po ashtu njoftoi se kanë nisur shkyçjen e rreth 450 bizneseve.
