Prokuroria e Speciales ka kërkuar që ish-Presidentit të Kosovës, Hashim Thaçi t’i ndalohen vizitat nga 14 persona të cilët organi i akuzës i ka futur në një “listë të zezë”.
Në mesin e tyre janë edhe tre vëllezërit e Thaçit si dhe ish-këshilltari i tij, Artan Behrami.
Këtë kërkesë, Zyra e Prokurorit të Specializuar (ZPS), e ka arsyetuar me kinse argumentin e “mbrojtjes së dëshmitarëve dhe të viktimave” nga veprimet e të akuzuarit të cilat ajo i konsideron “ndërhyrje në drejtësi”.
Dokument:
Tentativa e organit të akuzës për t’ia kufizuar edhe më tej vizitat Hashim Thaçit ka ngritur alarmin tek mbrojtja.
Kjo e fundit thotë se nëse një gjë e tillë aprovohet, do të ishte “goditje fatale për mbështetjen morale që i ofrohet Thaçit nga familjarët e tij”.
“Ndalimi i kërkuar është veçanërisht i pajustifikuar në lidhje me [REDAKTUAR], të cilët janë vëllezërit e z. Thaçi. Ata i ofrojnë një mbështetje të paçmueshme morale z. Thaçi, i cili është mbajtur në paraburgim në një vend të huaj, larg të afërmve dhe miqve të tij, për katër vjet e gjysmë. Së fundmi, ai ka humbur të atin, dhe për nënën e tij është jashtëzakonisht e vështirë, në mos e pamundur, të udhëtojë drejt Hagës”, potencon mbrojtja në përgjigjen e saj.
Dokument:
Për kërkesën e Prokurorisë së shpejti pritet të marrë një vendim Trupi Gjykues.
Sidoqoftë, edhe në rrethanat aktuale ndaj Thaçit dhe të akuzuarve tjerë janë në fuqi një sërë masash kufizuese, të cilat përfshinë:
Miratim paraprak nga Regjistri për çdo vizitë jo të privilegjuar, pas konsultimit me Shefin e Qendrës së Paraburgimit (DMU).
Konsultim me Prokurorinë kur ka dyshime se vizitori mund të sillet në mënyrë të papajtueshme me rregullat.
Përjashtim i vizitorëve të konsideruar të rrezikshëm për integritetin e procesit.
Ndalim i fshehjes së bisedave me pëshpëritje apo gjuhë të koduar.
Ndërprerje e menjëhershme e vizitës nëse shkelet ndonjë rregull.
Mbikëqyrje e vazhdueshme nga një person që flet shqip në çdo vizitë jo të privilegjuar dhe maksimum 5 vizita në muaj jo të privilegjuara (pa përfshirë ato konsullore/privat).
Regjistrim dhe shqyrtim javor i të gjitha vizitave jo të privilegjuara nga Regjistri me Prokurorinë për të identifikuar aktivitet të dyshimtë.
Raportim çdo dy muaj te Paneli për incidentet dhe mosrespektimet e rregullave.
