As seanca e 40-të për konstituimin e Kuvendit të Kosovës nuk prodhoi ndonjë rezultat. Edhe kësaj radhe, çështja e zgjedhjes së Kryetarit të Kuvendit mbeti e pazgjidhur, për shkak të insistimit të Lëvizjes Vetëvendosje që të mos heqë dorë nga kandidatura e Albulena Haxhiut.
Në seancë, 51 deputetë votuan për themelimin e komisionit për votim të fshehtë. Nuk pati kundër e abstenime – çka rezultoi me një tjetër seancë të dështuar.
Në sallë nuk munguan tensionet mes kryesuesit të seancës, Avni Dehari dhe deputetëve të opozitës, të cilët nuk propozuan emra për komision, por akuzuan për shkelje të Kushtetutës dhe kërkuan ndërprerjen e kësaj situate. Në disa raste, Dehari ua ndërpreu fjalën atyre, duke kërkuar t’i ndalet mikrofoni gjatë diskutimit.
Të enjten, Gjykata Kushtetuese ka vendosur që seanca konstituive e legjislaturës së Kuvendit duhet të përfundojë brenda 30 ditëve.
Pas disa muajsh pa ndonjë përparim, përfaqësuesit e opozitës vazhdojnë të akuzojnë Vetëvendosjen për bllokadë politike.
Procesi i konstituimit ka nisur më 15 prill dhe që nga ajo kohë, Kuvendi është mbledhur thuajse çdo dy ditë pa arritur të zgjedhë Kryetarin. Seanca e radhës është caktuar për të enjten, ndërsa qytetarët shikojnë nga jashtë një krizë që po zgjatet pa afat.
