Deputeti nga radhët e Lidhjes Demokratike të Kosovës, Avdullah Hoti, ka thënë se buxheti i vitit 2027 u miratua në Qeveri pas afatit ligjor, “i përcaktuar më 31 tetor sipas Ligjit për Menaxhimin e Financave Publike”.

Në vitet e kaluara, ai theksoi se kur ndonjë komunë e miratonte buxhetin komunal pas afatit ligjor, Qeveria nuk e përfshinte atë komunë në buxhetin e përgjithshëm. “Në raste të tilla, buxheti i asaj komune duhej t’i nënshtrohej veçmas procedurave të miratimit në Qeveri dhe në Kuvend”, shkroi Hoti në Facebook.

“Është e papranueshme kjo nëpërkëmbje e ligjit nga LVV-ja dhe sejmenët e saj”.

“Është mjerim politik”, siç thotë ai, “të shohësh 20 ministra të mbledhur për të miratuar buxhetin, të cilët, ndonëse janë të vetëdijshëm se po bëjnë shkelje ligjore, nuk guxojnë të hapin gojën për ta konstatuar për shkelje”.

Me këto sjellje, Hoti potencoi se “kjo nuk është Qeveri dhe këta nuk janë ministra”. “Këta janë një grup abuzuesish me ligjin dhe Kushtetutën”.