Presidentja e Kosovës, Vjosa Osmani, ende nuk e ka nënshkruar dekretin për datën e zgjedhjeve, sepse është në pritje të Gjykatës Kushtetuese.
Kështu ka thënë Bekim Kupina, këshilltar për media i Osmanit, i cili ka treguar se për këtë i ka njoftuar edhe partitë në takimin konsultativ që e pati me ta të premten.
“Nëse Gjykata Kushtetuese e vlerëson si të nevojshme caktimin e një mase të përkohshme, Presidenca e mirëpret atë, duke ritheksuar se masa në asnjë moment nuk paragjykon vendimin përfundimtar të Gjykatës lidhur me kushtetutshmërinë e dekretit”, theksoi Kupina.
Pas dështimit të seancës për zgjedhjen e Presidentit të enjten, Kryetarja e Kuvendit, Albulena Haxhiu, njoftoi se ishte drejtuar Kushtetueses në lidhje me vlerësimin e kushtetutshmërisë së procedurës për zgjedhjen e Presidentit.
“Po ashtu, përmes kësaj kërkese, kemi kërkuar që Gjykata Kushtetuese të vendosë masë të përkohshme për pezullimin e afatit kushtetues që lidhet me procedurën e zgjedhjes së Presidentit, deri në publikimin e aktgjykimit”, shkruante Haxhiu në Facebook më 5 mars.
Një ditë më pas, Osmani shpërndau Kuvendin dhe mbajti një takim me krerët e partive politike. I vetmi që nuk shkoi në takim ishte Albin Kurti i Vetëvendosjes. Ai dhe vartësit e tije kanë konsideruar antikushtetues dekretin e Osmanit.
