Rozeta Hajdari dhe tre të tjerët janë paraparë të dalin sot para Gjykatës në seancën fillestare për aktakuzën ndaj tyre për keqpërdorim me rezervat shtetërore.
Ministrja në detyrë e Tregtisë, Rozeta Hajdari, akuzohet bashkë me dy zyrtarë të ministrisë, Irfan Lipovicën dhe Hafiz Garën, si dhe me biznesmenin e afërt me Vetëvendosjen, Ridvan Muharremin.
Seanca pritet të fillojë nga ora 09:30.
Ata akuzohen për keqpërdorim të detyrës zyrtare, lidhur me procesin e rezervave shtetërore – për mosardhjen e shumë produkteve të blera, anashkalim të procedurave ligjore dhe zbulim të fshehtësisë zyrtare. Dëmi llogaritet të jetë rreth 3 milionë euro.
Në seancën e thirrur në dhjetor, ministrja Hajdari, e cila tashmë është zgjedhur edhe deputete, nuk ishte paraqitur, me arsyetimin se nuk e kishte marrë njoftimin nga Gjykata.
