Si “dhimbje të përjetshme” e ka përshkruar Arben Krasniqi, dhunën dhe maltretimin që u ushtrua nga një grup vajzash ndaj të bijës së tij të mitur. Ai, në një intervistë për VOX Kosova, ka treguar mes lotësh ndjesitë dhe traumat që i ka shkaktuar atij dhe familjes së tij kjo ngjarje.
“Plaga që i kanë shkaktuar vajzës edhe familjes sime frikësohem që ka me qenë përjetësore. Nuk mundem me shpjegu dhimbjen edhe plagën që i kanë shkaktuar vajzës edhe familjes sime”, thotë Krasniqi.
Data 6 gusht, që përkon me ditën kur Krasniqi e pa videon ku vajza e tij maltretohej, do të mbetet si data më e “errëta e jetës sime”.
Ai nuk ka dilema se si është zhvilluar e tërë ngjarja. Dhuna, thotë ai, ka qenë “e planifikuar, e organizuar”. “Motivet kanë qenë të xhelozisë”, shtoi.
Krasniqi këtë punë ia ka lënë organeve të drejtësisë. “Pres që ky shtet të merret shumë seriozisht me rastin, t’i dënojë në mënyrën më të madhe të mundshme”.
“Aspak nuk ndjej mëshirë për asnjë vendim që do ta merr gjykatësi apo institucionet tjera relevante në këtë rast. Nuk kam asnjë gramë mëshirë për dhunueset as për prindërit e tyre”, potencoi.
Nëse shteti nuk merr masat e duhura, Krasniqi thekson se do ta shohin Kosovën si “të pajetueshme”. “Edhe e kemi menduar largimin, e them me shumë sinqeritet”.
